A’o iai pea i Ausetalia le va’a la’u uta ma pasese o le itu’aiga o le Catamaran na fa’atau e le faigamalo talu ai i le tau e silia ma le 20 miliona tālā, o fuafuaga a le faigamalo ua iai nei e toe fa’aola tupe na fa’atau ai, i le fa’atau ese poo le lisi atu i se isi kamupani va’a, ua fa’ailoa e le pule sili o le kamupani va’alele o le Samoa Airways o le fa’aaogaina o lea va’a ma tupe e maua mai ai ua fa’aaoga iai le teugātupe a le kamupani va’alele o loo resitala i Ausetalia.

Sa fesiligia le pule o le Samoa Airways poo le a tonu le faata’otoga o lea fuafuaga e pei ona ia fa’ailoa ua talia e le komiti fa’afoe o le kamupani va’alele le faia o lea tulaga.

I le fa’amalamalama ai e le pule sili o le Samoa Airways o le tulaga ua fa’aaoga ai le teugātupe a le kamupani va’alele e teu iai seleni maua o le fa’aaogaina o le va’a Catamaran, o le avanoa foi lea na fesiligia ai ile tulaga o loo iai tapenaga mo le toe aumaia ose vaalele po’o ni va’alele tetele mo malaga a le Samoa Airways agai atu i Niu Sila ma Ausetalia.

Se finagalo o le afioga Fauoo Fatu Tielu , pule sili o le kamupani va’alele o le Samoa Airways o se auaunaga o loo pulea ma fa’agaioia e le malo i se fa’atalanoaga i lenei vaiaso.