E to’alima malu o le malo poo leoleo o le tatou atunu’u ua fa’amavae atu iai le Sui Komesina ma le pulega o le Matagaluega o Leoleo, Falepuipui ma le Toefuataina, ona o le fa’amoemoe e malaga e fa’atino tiute o le puipuiga o le filemu i lalo o le fu’a a Malo Aufa’atasi.

O le to’alima ua filifilia ua aofia ai ma ni tama’ita’i leoleo se to’alua. E le o fa’ailoaina e le Matagaluega i lana upega tafāilagi poo fea le atunu’u o le a galulue ai i latou ma le umi o le a to’esea ai ma le Matagaluega aemaise o aiga.

Ae o le ‘au malaga ua ta’ita’ia e le Ta’ita’i Leoleo Asiasi poo Inspector Faamatala Vaalele Tuvale ae lagolago iai le leoleo Satini Sinia le susuga, Fa’afetai Opeta Auva’a ma le leoleo Satini le susuga, Faatonu Leava.

O le leoleo ta’ailua poo Corporal Saisirita Uelese Tufuga ma le leoleo o Constable Pulemau Vito Uta’i ua aofia ai i le au malaga.

O le Sui Komesina le afioga, Leiataua Samuelu Afamasaga sa fai ma sui o le Matagaluega e momoli upu tima’i ma fautuaga i leoleo e to’alima ina ia galue faamaoni ma usiusita’i ma ia manatua le igoa ta’uleleia o Samoa aemaise o le Matagaluega ma aiga o le a tapua’ia o latou tiute o le a galulue ai mo le puipuiga o le filemu a Malo Aufa’atasi.