Ua tolo atu taualumaga a le Palemene i le masina faai’u o lenei tausaga le tu’uina atu i le Fono Aoao Ffaitulafono o le ripoti a le Komiti Faapalemene o tulaga aloa’ia ma amioga taualoa i su’esu’ega ua faatonuina e le fofoga fetalai faasaga i le ta’ita’i ma le sui ta’ita’i o le itu agai, fa’apea ma le sui usufono o le itumalo palota o Faleata 3.

O taualumaga a le Fono Aoao i le masina lenei o Oketopa lea sa toe tauaofia i le Aso Lua o lenei vaiaso e folasia ai le ripoti o ia su’esu’ega, peita’i ua talia e le palemene le lafo a le ta’ita’ifono o lea komiti le afioga i le tama’ita’i Sui Fofoga Fetalai mo se taimi fa’aopoopo e fa’aauau ai pea a latou su’esu’ega ae fa’amoemoe o Tesema e tu’uina atu ai le latou lipoti i le Fono Aoao Faitulafono.

O le talia o le taimi fa’aopoopo o le a talia ai le taunu’uga o lea su’esu’ega a le Komiti Fa’apalemene o tulaga aloa’ia ma amioga taualoa i tu’uaiga o le fou malo ma le tau fa’aleaga fa’asaga i le susuga Tuilaepa L Sailele Malielegaoi, tōfā Lauofo Fonotoe Nuafesili Pierre Lauofo Meredith, ma le tofa Lealailepule Rimoni Aiafi.

Sa fa’ailoa e le Palemia i lana saunoaga faaminisita ia Mati o le tausaga nei ia tuua’iga ma ia fa’atū ai se lafo na pāsia ina ia tu’uina atu ia tu’uaiga mo se suesuega a lea komiti faapalemene.