E le’o utuva le oo atu pea i le fa’amasinoga a le atunu’u o soligatulafono tau moliaga o feusua’iga fai fa’amalosi ma faiga lē popoi ma tufanua tau i lea solitulafono, ua a’afia ai nisi o alo teine lāiti ae tuua’ia ai nisi lava o le itupa o ali’i e iai so’otaga vāvā lalata fa’alē’aiga.

O nisi ua molia ai o tamā ua matutua tausaga o le soifua a’o ē ua a’afia o fanau teine a nisi o ā latou fanau. O atugaluga ma fa’anoanoaga o le fa’amasinoga ua fa’aleo ai pea i ia mataupu tau fa’amasinoga ona ua le malu fanau i o latou aiga ma ua malepe ai ma le vā tapuia.

I le faia o le fa’asalaga faafalepuipui mo se tama ua 63 tausaga o le soifua i lona ioeina o solitulafono o lona faia o ni gaioiga e fesoota’i i tulaga tau feusua’iga, i se tasi o alo teine o lona atali’i matua.

E fa’alua ona tupu ia faiga solitulafono i le masina o Oketopa o le tausaga e 2022, ae o Oketopa o lenei tausaga ua fa’ato’a lau ai le fa’aaiuga i le fa’asalaga lea e 3 tausaga ma le 3 masina ua falepuipui ai.

O le tāua o le malu puipuia o fanau i totonu o aiga ua fa’aalia e le fa’amasinoga o lana faamuamua lea i le fuaina o se fa’asalaga fa’afalepuipui pe a fa’amaonia ni solitulafono tau fai’aiga.

Na amata le fua o le faasalaga i le lima tausaga mo le tama 63 tausaga le matua, ae na toese le tasi le tausaga ma masina e 6 ona o itu lelei fa’asino i lē ua molia, atoa ai ma le ioeina e le tamā o moliaga e ui na tuai ona suia lana tali tete’e i le ioe.