O le toasefulu lua o tama tane e aofia ai ni matai ma ni taulelea o le nuu o Lefagaoalii i Savaii ua latou teena uma moliaga ua tuuaia ai, e pei o le moliaga o le faaoolima ma le ave faamalosi poo le kidnapping.
Na toe valaau lenei mataupu i le amataga o lenei vaiaso ma tuuina atu e le loia o Alex Su’a a latou tali tetee.
Ua faatulaga e le faamasinoga o le masina o Me o le tausaga fou 2024 o le a suesueina ai moliaga ma tuuina atu molimau a leoleo.
O i latou uma e toa sefululua o loo tuuaia ona o le gaioiga na saisai ai aao o se matai matua o lea afioaga ae amo e taulelea i totonu o le nuu e mafua i se finagalo o le nuu e lei usitaia e le matai na faatino iai le gaioiga a matai ma taulelea ua molia.
