O le CD pese a le Kolisi o Avele ua faalauiloa i le afiafi o le Aso Sa na te’a nei i se sauniga lotu i le hall a le kolisi a o lumanai ai polokalame eseese ua tapena e le asosi o tama ma teine tuai sa a’oa’oina i le kolisi e faailoga ai i le vaiaso atoa lenei le atoaga o le selau tausaga o Avele.
Ua molimauina le toatele o aumalaga mai atunuu i fafo o i latou sa faafailele le olaga a’oa’oina i le kolisi i tausaga ua mavae ua malaga mai e fia auai i le selau tausaga lea o le a amata le polokalame i le Aso Lua o le vaiaso nei i le lesitalaina o suafa uma o i latou ua auai, sosoo ai le Aso Lulu o le a lanumeamata ma samasama ai lanu o le taulaga Apia, i savali a vasega o lea tausaga ma lea tausaga, lea ua faamoemoe e taunuu uma lea savali i luma maota o le Malo i le eleele fou, ona faia ai lea o se sauniga o le a saunoa ai le ta’ita’i o le Malo le afioga i le tamaitai Palemia, afioga Fiame Dr Naomi Mataafa.
O le Aso Lulu lava lea o le a tatala aloaia ai ma se tasi o galuega tele o le selau tausaga o le Maota poo le Fale Samoa o le kolisi ua mae’a ona toe fausia i totonu o le lotoā a le kolisi o Avele.
O se galuega o le a sami ai foi i nisi o polokalame e pei o faafiafiaga o le a saunia e le Kolisi a tamaitai le Papauta Girls College a le Ekalesia Faapotopotoga Kerisiano Samoa, Kolisi o Leififi mai aoga a le Malo, Kolisi o Sagata Maria i Vaimoso a le Ekalesia Katoliko, ma le Kolisi o Uesile poo Wesley Coillege a le Ekalesia Metotisi.
O le umusaina foi o le maota o le kolisi o le a faafofoga ai le auvalaaulia ma tama ma teine tuai o Avele aemaise fanau o loo a’oa’oina i le kolisi i le pese o le selau tausaga ua saunia e i latou sa aooga i Avele ae ta’ita’ia lea pese e se tasi o fatu pese lauiloa le susuga Tupai Faasalafa.
O le Aso Tofi o le a faia ai polokalame e pei o taaloga e aofia ai le taamilosaga tapolo o le selau tausaga o Avele, faapea le koneseti mo aiga poo se family concert.
O le Aso Faraile o le fiafia tele o le selau tausaga ma le Aso Toonai o le tafaoga i le matafaga i Tafatafa Falealili.
O le Aso Sa e tapunia ai polokalame uma o le selau tausaga ma ta’ape ai le toatele ua malaga mai i Samoa ona o le aso faailogaina o le selau tausaga o Avele.
O loo avea ma Malo faaaloalogia le Ao o le Malo o le Atu Kuki sa a’oa’oina i le kolisi i tausaga ua mavae a o avea Avele ma aoga sa a’oa’o ai mataupu i tomai tau faatoaga.
