O le minisita sinia a le Hamas i fafo mai o Gaza, atoa ai ma isi ona ta’ita’i ua lipotia ua lē o toe iai i Doha e pei ona faamaonia mai e se sui o le malo o Qatar ma isi mai le Palemene a Palesitina.

Ua o latou faailoa ane foi ua lē o toe iai le ofisa o le Hamas sa iai i Qatar ma ua taofia uma foi ana fesoota’iga i Gaza i se maliega e taofia ai vesiga mo le taimi nei a o le’i tapunia aloa’ia lo latou ofisa lea.

O le lipoti a le BBC ua ta’ua ai le faatalanoaga ma le sui o le Palemene a Palesitina na ia faailoa ai ua toe faatulaga nofoaga e iai sui o le Hamas o loo feagai ma feutana’iga i le mataupu lea ma ua natia nofoaga ua aga’i iai.

E ui sa teena e le sui lea o le Palemene a Palesitina nisi faamatalaga e faapea sa talanoa Qatar i le Hamas ua tatau ona aga’i ese ae na ia ta’ua ua faatulaga lelei ma le toto’a e Qatar lona tulaga ia ‘alofia ai nisi vesiga e tula’i mai i le va o le Peresetene o iai nei o Amerika ma le Peresetene filifilia o Donald Trump.

Ina ua asiasi ane le Palemia o Isaraelu Benjamin Netanyahu i Gaza i le vaiaso nei sa ia toe faamamafa ai i sana faamatalaga e matua’i leai se avanoa o le Hamas e na te toe pulea ai se vaega o Gaza pe a mae’a le taua o fai nei.

Sa ia faailoa foi o le a toe faafoi mai tagata Isaraelu o loo ave faapagota ma toe faamautū ai ma lana ofo e 5 miliona mo se tagata na te toe faafoi ane se tasi o ave faapagota ia Isaraelu.

Fai mai e 97 tagata Isaraelu o loo taofia pea e le Hamas, e 34 ua talitonuina ua maliliu.

Puna o Faamatalaga: https://www.bbc.com/news/articles/c86qd99nqgyo