covid samoa
Photo by - Government of Samoa

Sa’oloto tagata malaga i Samoa leai se fitu aso faanofoesea 

Ua lē o toe iai se aiaiga o le fitu aso e faanofoesea ai tagata malaga mai fafo i o latou aiga poo le home quarantine, pe a taunuu i Samoa, ae e sefulu aso e faanofoesea ai i le aiga ma faia siaki i le falema’i pe a taunuu mai ae fai le su’ega o loo aafia i le siama o le Koviti-19.

O le finagalo lea o le sui Faatonu sili o le soifua mālōlōina le afioga Tagaloa Dr Robert Thompson, ina ua tāpā se faamaninoga o aiaiga ua iai nei Samoa ona o puipuiga o le faama’i. Na mafua ona tapa lea faamaninoga ona o le fesiligia e le faipule o le Itu agai le tofa Tapunuu Niko Lee Hang i le Palemene, o le auai o le Minisita o Faalapotopotoga Tuma’oti a le Malo ma le Matagaluega o Alamanuia Pisinisi ma Leipa i le fono usu a Samoa i le Aso Lulu, ae na taunuu mai i le mae’a o sana malaga faalemalo i atunuu i fafo i le amataga o le vaiaso nei ma e tatau ai ona faanofoesea e pei foi ona faia e isi sa malaga mai fafo.

Faaalia e le sui faatonu sili o le soifua mālōlōina o le amataga o Iuni na suia ai aiaiga mo pasese malaga mai fafo ma faamuta ai le fitu aso faanofoesea i le aiga pe a taunuu tusa lava pe lē o aafia i le faama’i. Na tāpā se finagalo o le Minisita ina ua mālōlō le fono i le taeao o le Aso Lulu, ma ia faaalia ai e lei maua o ia i le siama talu ona faia ana su’ega i le tuua o Samoa ma taunuu i Niu Sila faaauau ai i Europa, ma o le taunuuga foi ia o ana su’ega ina ua toe taliu mai i le atunuu.

O le Aso Lua o le vaiaso fou e toe faailoa ai e le komiti o faalavelave faafuase’i o loo tuuina atu fautuaga i le kapeneta i aiaiga o puipuiga mo le isi laasaga o iai pea le atunuu i taimi o faalavelave faafuasei le state of emergency ona o le faama’i. O le lipoti lata mai o le fitu ua mavae i le pipisi o le Koviti-19 o loo faailoa ai i faamaumauga a le soifua mālōlōina le to’aitiiti o tagata malaga o loo usitaia le oo atu i maota gasegase e faia a latou su’ega poo test, ae o le to’atele e lē o logosa’ia lea aiaiga tāua. Faaalia e le sui faatonu sili o lea auaunaga tāua, ua tuu i le komiti o faalavelave faafuase’i latou te mata’itūina lea tulaga. 

Scroll to Top

Keep uptodate with Radio Samoa activity & promotion

* indicates required