Ua mae’a le taamilosaga lakapi o le World Pacific Challenge sa talimalo ai le Lakapi Samoa ma lo tatou atunuu ma ua sii ma ave e le ‘au a Iapani le Ipu o le Siamupini o le taamilosaga o lenei tausaga, ae o le siamupini o le tausaga ua mavae le ‘au o le Fiji Warriors ua tulaga lua, ae tulaga tolu ai le Manuma Samoa.

O Tonga ua tietie i le tulaga fā ma o le itu mautinoa o ‘au ua lē manuia o le a toe foi e fonofono faaletonu ma toe tulimatai le tausaga fou 2025 pe o le a iai se suiga lelei.

O le mae’a o le taamilosaga lenei i le faaiuga o le vaiaso ua mavae atu nei, na faailoa ai suafa o tama e toasefulu o le Manuma Samoa ua filifilia i le polokalame e ta’ua o le World Rugby Pacific Combine lea o le a maua ai le avanoa e su’e pe test ai lo latou tomai ma le malosi i le taaloga, faapea le amio ma isi vaega tāua e fesootai i le taaloga lakapi e pei o le sootaga i auala o faasalalauga le media.

O le a maua ai foi le avanoa e faia ai se taaloga a ia alo o le atunuu ma le ‘au o le Junior Manu Samoa.

O le toasefulu lenei ua filifilia mo le World Rugby Pacific Combine:

1. Pitone Avito

2. Aiesi Siolo

3. Totoa Auvaa

4. Daryl Saofai

5. Tagiilima Ripine

6. Malaesaili Elato

7. Faalava Toetu Tuamasaga 

8. Owen Niue Fetu

9. Taitaifono Senio Tavita

10. Bitner Tafili.