Ua samania nei e le faamasinoga e ala i se tusi saisai se faafeagaiga ma lona faletua ina ia tatau ona oo atu i le Aso Faraile lenei e tuuina atu a la molimau e lagolago ai moliaga a le susuga Papalii Tavita Moala faasaga i le afioga Loau Solamalemalo Keneti Sio.
O lenei mataupu a le itumalo a Sagaga No.1 na faatulagaina o le Aso Tofi e tatau ona oo atu ai nei molimau peitai e le’o le tulaga lea na iai ma faia ai loa le faatonuga a le faamasinoga e saili atu le faifeau ma lona faletua i le tusi saisai.
Na fa’aalia e Papalii ina ua malolo le faamasinoga i le vaiaso nei e faafā ona oo i le faafeagaiga ma lona faletua lea o loo faamautu i le nofoaga o Siaosi Palauni i le lotoā a le Metotisi i Faleula.
O loo faaauau pea le suesuega o mau o lenei tagi o mataupu tau palota ae mo le mataupu a Aana Alofi No.2 ua maea ona suesue molimau o le tagi a Lolomatauama Eseta Mataituli faasaga i le susuga Aiono Afaese Toleafoa Faafisi ma o lenei Aso Faraile o le a tuuina atu ai folasaga faaiu a loia ma tālia ai loa se faaiuga.
O tagi mulimuli lava ia o mataupu 28 na tuuina atu i le faamasinoga o faigapalota e mafua i moliaga faatosina solitulafono ona o le palota tele i le masina o Aperila.
