Ua teena ma lē talia e le Faamasinoga Maualuga le finauga faaletulafono sa tuuina atu e le vaega faaupufai e puipuia aiā tatau a tagata, ma le sui tauva tama’ita’i i le palota tele ia Aokuso mo le nofoa o Alataua i Sisifo, le afioga Aliimalemanu Alofa Tuuau, lea sa autū i le faaaogāina o le aiaiga 44 1A o le faavae e faasino i le filifilia o le nofoa faaopoopo o tinā ma tama’ita’i i le Palemene, ina ua mae’a le faitauga aloa’ia o le palota tele sa faia i le 3 masina talu ai.
Sa finau itu na talosaga sa tatau i le komesina o faigāpalota ona faaaogā pe activate lea vaega o le faavae ina ua mae’a le faitauga aloa’ia a o le’i tuuina atu suafa o sui tauva o le palota tele na manumālō i le afioga i le Ao o le Malo mo lana faamaoniga.
Sa finau foi itu na talosaga sa lē tatau ona tauaofia le ulua’i fono a le paeaiga 18 a le Palemene lea na faatauto ai sui tauva uma na manumālō, ona sa tatau ona aofia ai ma le sui tauva e atoa iai le ono o nofoa o tama’ita’i faipule i le Palemene.
O le afioga Aliimalemanu Alofa Tuuau o le sui tauva tama’ita’i lea na te ausia le 10 pasene o palota e agavaa ai i le nofoa e atoa ai le to’aono tama’ita’i faipule i le paeaiga 18 o iai nei a le Palemene.
O ia foi na agavaa faatasi ai ma le isi sui tauva tama’ita’i na atoa ai le ono o nofoa o tama’ita’i i le paeaiga 17 a le Palemene.
Sa tuuina atu e itu a le patī faaupufai o le H.R.P.P. ma le afioga |Aliimalemanu Alofa Tuuau se mau e faavae ai lana finauga e faapea e mafai e le Faamasinoga Maualuga ona faia se isi i’uga e sui ai le faai’uga a le faamasinoga o talosaga poo le court of appeal a le Faamasinoga Maualuga na faia ia Iuni o le tausaga e 2021, lea na poloa’iina ai le faato’ā faaaogā o le vaega 44 1A o le faavae e sa’ili ai ni nofoa e atoa ai le numela e to’aono o tama’ita’i i le Palemene, pe a mae’a faamasinoga o le palota ma mae’a foi ni palota laiti e ono faatino ona o ni faai’uga o tagi o le palota.
O le mau a le itu talosaga o lena faai’uga e mo na o mea na tutupu mai i le mae’a o le palota tele o le 2021, ae o le aiaiga o le faavae e faasino i le 10 pasene o loo manino e tatau ona faaaogā i le mae’a o le faitauga aloa’ia pe afai ua mana’omia le faaatoa o nofoa o tama’ita’i i le lē maua lea o le to’aono o sui tauva tama’ita’i sa manumālō i le palota tele.
I le iloiloga a le faamasinoga i le finauga faaletulafono na tuuina atu ua faia ai lana faai’uga e faalēaogā le talosaga, ona ua manino le faai’uga a le faamasinoga o talosaga e lē mafai e le Faamasinoga Maualuga ona toe faia iai ni suiga ma ua mautū ma mausali lea i’uga.
O le taunuuga o lea matāupu tau faamasinoga sa iloiloina e le afioga i le faamasino o le Faamasinoga Maualuga le afioga Leiataualesa Darrel Clarke, e faato’ā faaaogā le aiaiga o le tulafono faavae e sa’ili ai le 10 pasene e atoa ai le ono o nofoa o tama’ita’i i le Palemene, pe a mae’a faamasinoga o tagi o le palota ma ni palota laiti o le a faatino.
O le taimi nei ua lua nofoa e mana’omia o tama’ita’i i le Palemene e atoa iai le to’aono ina ua soloia le tofi o le sui faipule tama’ita’i sa filifilia i le palota tele mo le itumalo o Safata 1 le afioga Te’i Seve Fuimaono.
E na o le to’alima tama’ita’i na manumālō mai i le palota tele ia Aukuso.
O itu sa auai i lea finauga faaletulafono o le vaega e puipuia aiā tatau a tagata ma le afioga Aliimalemanu Alofa Tuuau sa tula’i ai le tama’ita’i loia le afioga Savalenoa Mareva Betham Annandale, o le Komesina o faigāpalota na molia e le itu talosaga ae sa tula’i ai le Loia Sili le afioga Su’a Hellene Wallwork Lamb, ma le itu a le vaega faaupufai o le Faatuatua i le Atua Samoa ua Tasi sa faasaga foi iai le talosaga lea sa tauave e tama’ita’i loia le afioga Mauga Precious Chang ma Miruel Lui.
O le tasi lea o faai’uga a le Faamasinoga Maualuga a le atunuu ua faamae’a ai galuega o lenei tausaga a o le’i alo le faamasinoga mamalu a Samoa i aso mālōlō o le Kelisimasi ma le Tausaga Fou.
