O le sainia ai o lenei maliega e le Iunivesite a le atunuu ma le Ofisa o Malo Aufaatasi i Samoa nei ina ia mafai ona faatino ai faatalanoaga e laualuga ai mataupu i avanoa tutusa (gender equality) i le sao o tina ma tamaitai i le atinaega o le tamaoaiga o le atunuu.
I pepa o faamatalaga mai le Ofisa o Malo Aufaatasi i le atunuu, o le aotelega o vaega o atinae o le tamaoaiga e aofia ai le itu tau faigafaiva, puipuia o le gataifale, uafu ma vaa, galuega ma atinae tetele i nofoaga tumatafaga ma isi.
E pei ona iai se faatalanoaga i le aso ananafi ma le faamoemoega ina ia fefaasoaai ai agavaa ma tomai e faaaoga ai taiala mo le tamaoaiga i avanoa tutusa.
Faailoa e le Peresitene o le Iunivesite, Professor Tuifuisaa Patila Amosa le tāua o faatalanoaga faapenei i mataupu mo le agai luma.
“Ina ia agai i luma le faalauiloa o avanoa tutusa e ao ina unaia tina ma tamaitai e auai ina ia lagolago malosi i le tamaoaiga i totonu o le Pasefika.”
O le avanoa foi lea e faasoa ai tomai o paaga o loo galulue i polokalame i totonu o le atunuu ma le Pasefika e faatino gaioiga talafeagai, faasoa i faafitauli ma le unaia lea o tamaitai i avanoa tutusa mo le atinaega o le tamaoaiga.
I le saunoaga a le Faatonu o le Ofisa o Malo Aufaatasi i le Pasefika ia Kanni Wignaraja e tuuina mai ai ni faataitaiga o avanoa e tutusa uma ai tagata uma.
“Ia lagolagoina tupulaga talavou ma tamaitai i galuega, o agavaa faapisinisi, o le sao o tamaitai i ona tiute ma matafaioi i soo se vaega.”
O le auiliiliina o le lipoti mai lenei faatalanoaga o le a faasoaina lea i le mamalu lautele o le atunuu.
