O se tasi lenei o itumalo ua mafai ona faamatuuina iai le seleni mo le faagaioiina o galuega faatino mo le atinae o ona tagata.
O le sainia ai o le maliega a le itumalo o Lepa ma le Matagaluega o Tina ma Tamaitai na faatautaia lea e le Afioga i le Minisita Mulipola Anarosa Ale Molioo, Minisita o Tupe Afioga Lautimuia Afoa Uelese Vaai ma sui o le Fono Faavae a le itumalo.
Saunoa le Minisita ia Mulipola o le polketi mo atinae o se faama’ite lea a le Malo e faaauauina pea auā se manuia o ona tagata lautele.
“E pei ona silafia o le uluai vaega tupe lea na faamatuuina atu e $200,000 mo le faavaeina o le ofisa mo le Fono Faavae mo le itumalo ma ua mae’a foi ona tuuina mai le lipoti e tusa ma taiala e faaaogāina ai lea vaega tupe.
“Sa lauliliuina foi e le Komiti Faafoe e ui a i le tele o fesili sa tuliloaina ai le itumalo ae ua manatu lava le Komiti Faafoe ina ia faamatuu loa lenei vaega tupe mo atinae a le itumalo ae faaauau pea ona faatino sailiiliga a le Matagaluega o Tupe i vaega tupe e pei ona sa fesiligia pea ua avea ma to’a o le faamoemoe.
“I le mae’a ai o le sainia o le maliega i lenei aso o le a iai le fuafuaga ia faamatuuina atu lea vaega tupe muamua e $150,000 mo le faagaioiiina o le ofisa o le itumalo.”
Faaalia e Mulipola o lenei vaegatupe ua fuafuaina mo le totogiina o le aufaigaluega e toatolu, o le totogiina o alauni o le Komiti o le Fono Faavae ma faatupe ai manaoga o le ofisa e iai ma le lisiina o le ofisa o le Fono Faavae.
“Ua taoto foi faaiuga a le Komiti Faafoe mo lisi e $2000 le totogi i le tausaga ma e ao ona silafia e lo outou mamalu aemaise ai le Komiti o le Fono Faavae le faagaioiina o lenei faamoemoe.”
Ina ua mae’a lenei sainigalima ua tapena ai e le Matagaluega o Tina ma Tamaitai vaega uma e manaomia mo le tuuina atu i le Matagaluega o Tupe mo le faatinoina o la latou pitolaau.
“E lima aso faigaluega e amata atu i le asō e faagaioi ai ona maua lea o le seleni i le tusitupe a le itumalo.”
O le faamanatu mai le Minisita, “Ua toe tasi le masina o totoe o lenei tausaga ma e manaomia lo tatou galulue faatasi ma le sao o le Komiti o le Fono Faavae ma litumalo e unai ai atinae ua fuafuaina.”
