Na manuia le taunuuga o le fonotaga na talimalo ai Amerika i taitai o atunuu o le Pasefika.
O lea na tali e le peresetene Joe Biden taitai mai atunuu e 12 o le Pasefika e aofia ai ma le palemia o Samoa, Afioga Fiame Naomi Mataafa ma e na o ia foi le sui usufono tamaitai.
O se fonotaga na usu a o lē faigofie ia Amerika le taumafai mai o Saina i le Pasefika.
Ma i lea fonotaga na autasi ai sui usufono uma e faia se maliega o loo tauaofai ai itu e 11 e galulue faatasi ai, e ui o lea na muai sau tala a o loma le fonotaga o loo leai mai Solomona.
Ta’ua e le malo tele, o lenei fonotaga o se tasi o vaega o loo taumafai malosi ai Amerika e faamalosia ana faiga faapaga ma atunuu o le Pasefika.
Ae i le lauga a le peresetene o Amerika, Joe Biden na ia faailoa ai i le fono e aunoa ma le ta’ua o Saina, o loo faamoemoe le malupuipuia o le lalolagi i le malupuipuia o atunuu o le Pasefika.
Ae mai le sooupu o le va i fafo a Saina Mao Ning i tala a le leitio a Niu Sila, e le tatau ona avea le Pasefika ma maa o le taaloga mu o loo finau iai malo tetele.
