O se tasi alii taalo ua saini nei lana konekarate i le kalapu a le Richmond Tigers, le alii o Mykelti Lefau ua ia ta’ua lona fiafia tele i le sainia o lana uluai konekarate faapolofesa i le AFL.
Ta’ua i lipoti a le One News e ui e lē na o Lefau le alii taalo e iai sootaga mai i Niu Sila nei o loo taalo i Ausetalia ae ua ta’ua e na o Lefau le tama taalo na soifua ane ma tuputupu a’e i Niu Sila nei ma ua aofia nei i le taamilosaga ua sauni o lea faagatama.
Fai mai o Lefau sa taalo i le lakapi Iuni ma le liki ae na agai ese ma Aukilani a o talavou mo sailiga o avanoa i Ausetalia a o aumau ai ma si ona tuaa ae nofo pea si ona tina ma aiga i Aukilani nei.
O le mau a le faiaoga a le Richmond Tigers, Steve Morris o Lefau e malosi tele ma e tolu tausaga na o la galulue faatasi ai.
O le igoa o le alii taalo e pei ona faaiu ai le lipoti e faapea na maua mai i le alii fai ata tifaga o Mykelti Williamson i le ata o Forrest Gump, ai o le ata lea na matamata ai le tuaa tina o le alii taalo i le taimi faatoa ola ai lana pepe.
O le masina fou e amata ai le taamilosaga a le AFL.
