O le auai atu o le afioga i le Minisita o Alamanuia Pisinisi ma Leipa faapea le Pulega o Tagata Tafafao, le tofa Fata Ryan Schuster i le fono a Minisita o fefaataua’iga a malo o le Pasefika sa usuia i le atunuu o Solomona, ua ia sainia ai le Laasaga 2 poo le Phase 2 o le feagaiga o fefaataua’iga i le va o atunuu o le Pasefika ua aofia ai Ausetalia ma Niu Sila lea e ta’ua o le PACER Plus.
Ua faailoa ai i lea fono faaminisita ma le isi fesoasoani a Ausetalia e tusa ma le 23 tesimale 2 miliona tupe Ausetalia ma le 10 miliona mai le malo o Niu Sila e faatino ai galuega mo le siitia o le tapenaina ia lelei ma siitia maualuga ai le tulaga o oloa mo fefaataua’iga a atunuu.
Ua faailoa ai i se pepa o faamatalaga le lagolago a Samoa i le Laasaga 2 o le feagaiga ona o le a siitia ai i se tulaga lelei le tamaoaiga o le tatou atunuu i le va ma isi malo i le faatinoina o polokalame tau i le atina’eina o oloa mo fefaataua’iga.
