O le vaa la’upasese fou o fausaga ua ta’ua o le catamaran sa faamautū e le faigāmalo talu ai a le Faatuatua i le Atua Samoa ua Tasi i le ta’ita’iga a le afioga Fiame Naomi Mataafa sa tauaveina le tofi Palemia, ua lē o mautū i le taimi nei pe oo ona aumai.
Ua māfua lea tulaga ona o lea ua faailoa e le Palemia ina ua fesiligia i le feiloa’iga ma tusitala i le Aso Faraile ua mavae, o loo faia pea nisi o sa’ili’iliga i le tulaga saogalemu o lea fausaga o vaa la’upasese ma uta, ona o malaga i le va o motu o Upolu ma Savaii e faaeteetegatā tele le vainuu pe a oo i taimi e tulaga faaletonu ai le tau.
Se finagalo o le Palemia, susuga Laaulialemalietoa Leuatea Polataivao Fosi i le tulaga o loo ta’oto ai le aumai o se isi vaa fou mo malaga i le va o Mulifanua ma Salelologa.
O le vaa lea sa fuafua le faigāmalo talu ai a le Faatuatua i le Atua Samoa ua Tasi, e amata faaaogā i le masina o Oketopa o le tausaga nei.
