Ua faaauau pea le sailia o le alii e suafa ia Stanley Turvey lea fai mai leoleo o loo faaaupegaina ma e lamatia ai soifua o tagata.
E 33 tausaga o lenei alii o loo iai se poloaiga i lona igoa e pue ai e leoleo.
O loo feta’ua’ia sa ia tafana ane leoleo, ave faamalosia se tasi alii ae faasiilima ma faaoolima foi i se tamaitai i Yarrawonga.
O le asō ua maua ai e leoleo le taavale sa ia faaaogāina i le faaitu o Tatura e tusa ma le 176 km i le itu i Matu o Melepone.
Ta’ua e le ABC na amata sailia mai e leoleo Turvey i le Aso Gafua ina ua agai atu leoleo e pue mai i se fale i Katandra West ona o se mataupu na aofia ai ae sola ese ma leoleo.
O le sailiga la lea o loo faaauau pea ma ua talosaga leoleo i le atunuu ia logoina vave i latou pe a vaaia Turvey ae aua ne’i agai iai se tasi.
E iloagofie Turvey ona e iai mamanu i ona foliga.
