Ua talosagaina nei e le Matagaluega o Leoleo ma Falepuipui le fesoasoani a le mamalu o le atunuu i le sailia o se taule’ale’a o loo masalomia i suesuega o le soloitulafono o le talepefale ma le gaoi.
O le alii o Savelio Tauanuu poo Lio Tauanuu e 21 tausaga le matua mai afioaga o Vaitele Fou, Vaiala, Lotofaga Aleipata ma Vaipuna.
I se faasilasilaga faalauaitele a le Matagaluega o Leoleo na taua ai :
“E fautuaina le mamalu o le atunuu, o se soligatulafono lou faalafiina lea o se isi ua ia soliina le tulafono.
E tatalo atu i aiga ma uo o lenei taule’ale’a ina ia fautuaina o ia, ia oo mai i totonu. Afai o loo silafia e seisi se faamatalaga e mafai ai ona saisaiina faaletulafono lenei taule’ale’a, ia vave faafesootai mai le ofisa o Leoleo i Apia poo se isi ofisa o Leoleo e latalata ane”.
O le manatu maualuga o le Matagaluega ina ia galulue faatasi le atunuu ma le pulega mo le saogalemu ina ia saili lea alii ma faaoo atu mo suesuega.
