A’o tau faama’ea i le vaiaso nei le pu’eina o le ata faasolo tau televise o le Survivor, lea o loo galulue ai se ‘au pu’e ata TV mai Ausetalia, o lo’o faia su’esu’ega a leoleo ile fia maua oni faamatalaga e sailia ai se tagata poo ni tagata ua latou aveesea ni mea faigaluega e aofia ai se masini pu’e ata tau televise.

O loo iai le talitonuga o leoleo na gaoia mai ia mea faigaluega mai le nofoaga o loo faamautu ai le au pu’eata mai Ausetalia ua silia nei ile lua masina talu ona malaga mai i Samoa e pu’e le ata faasolo o le survivor.

O le nofoaga i Togitogiga ile aga’i i Siumu ma le atu Falealili o loo pu’eina ai le vaega mulimuli o lea ata faasolo ile faamoemoe e taualuga ile faaiuga o le vaiaso nei, ma iloa ai le tagata o le a manumalo. E ui ina ta’uleleia Samoa ise tasi o vaega o lea ata taiu televise sa pu’eina ilo tatou atunuu ile ono ai lenei o tausaga peitai o lea ua aliali mai nisi o uiga le popoi ma le lima totoa ua ta’uvalea ai taumafaiga e faatosina mai pisinisi faapea e agai mai i Samoa e pu’eina ai e pei o ata tifaga.

O loo faagasolo pea su’esu’ega a leoleo ae o le taimi nei e pei ona faailoa e le Komesina o leoleo i lipoti, e lei maua se tagata poo ni tagata ua masalomia.