O loo sa’ili e leoleo Graeme Dylan Shuter o se alii e 34 tausaga le matua.
O lea alii o loo tuua’ia i ni matāupu se lua o osofa’iga matagā poo le indecent assaults na tula’i mai i le taeao o le aso 22 o Novema i le faaitu o Mayoral Drive.
Māua i lipoti mai le leitio faavaomalo, poo le 20 minute e te’a ai le 9 i le taeao na taumafai ai Greame e faatino nei gaioiga matagā i se tama’ita’i na ia mua’i tau atu iai.
Faamatala na o le savali atu lava o lea alii taumafai e taofi se tama’ita’i ma taumafai malosi e faia iai ni uiga matagā.
Ua faaalia e le’i taunuu faiga a lea alii ina ua mamulu le tama’ita’i ma tamo’e ese aga’i i le isi itu.
Na faamauina e le’i umi ae maua e Graeme Dylan Shuter, se isi māfine o loo tūtū i se fale faatali pasi, ma o lea na ia taumafai ai foi e faia iai ni gaioiga lē tautamalii.
Ta’ua o se tagata na savali ane i lea faaitu na iloa atu gaioiga a lea alii na tamo’e atu ma tulei ese Graeme ma faasaoina mai ai lē ua aafia.
I faamatalaga o le taimi mulimuli na vaaia ai Graeme, o le taimi lea na sola ese ma aga’i atu i Albert Park.
Ua faamaonia le tuuina mai e leoleo o ni tusi saisai mo le taofia faapagota ai o lenei alii, poo le vaega ua ta’ua i le gagana Peretania o le warrants for arrest, ma ua faasalalau ai nei i auala o fesoota’iga uma e pei o upega tafa’ilagi le social media ma tuuina atu faamaumauga i leoleo uma o loo i le taulaga ma faaitu lata ane i nofoaga na iai lea alii mo a latou sa’iliga.
Puna o Faamatalaga: https://www.facebook.com/AucklandDistrictPolice/posts/pfbid036Ydz7FizUTUmUZAHngvXEFAMiMzLrXKhudbU2QJBQWUXdx5NZRVE7ZrDLBN36qDQl
