Tusia : Maina Vai 

Ua faamaonia mai e le Tamaita’i Minisitā o Faamasinoga ia Matamua Vasati Sili Pulufana e faapea,  ua sa’i atu le Peresitene o le Faamasinoga o Fanua I le tulaga o lana talosaga mai e faataatia faamasinoga tau fanua ma suafa seia maea le suesuega o faia nei a le komiti o le Palemene.

O le tusi sa tuuina atu ai lea talosaga a le Tamaita’i Minisitā o Faamasinoga o loo maioio lelei ai tulaga e ao ona tagai iai le LTC e alagatatau ai ona faataatia ana galuega mo se taimi le tumau.E aofia ai ia tulaga, le tulaga le mautonu o le atunuu i tulafono e 4 eseese lea ua faia nei iai le galuega a le komiti faapitoa o le Palemene.

E lē gata i lea a’o le tulaga e ao ona silafia e le Peresitene o le tofiaina o i latou e aofia ai ma le Sui Peresitene, faapea Faamasino o le Faamasinoga o Fanua ma Suafa sa filifilia mai lea i manaoga o le tulafono o fanua ma suafa 1981 lea ua faaleaogaina nei ina ua pasia ma faamalosia le tulafono o Fanua ma Suafa 2020 (LTA2020.) 

Talu ai lea tulaga o tofiga uma sa filifilia i lalo o le tulafono o fanua ma suafa 1981 na faaleaogaina lea ia Mati aso 15 o le tausaga ua mavae ina ua faaoga le LTA 2020.

Sa faapea mai fo’i le tamaitai Minisitā o loo manino e leai se vaega na sefe mai o le tulafono o fanua ma suafa 1981 e faatumauina ai tofi o i latou nei, poo lo latou filifiia, e leai foi se vaega e faatumauina ai se totogi mo i latou ia poo so latou tulaga e pei ona iai ae lei faaleaogaina le Tulafono Fanua ma Suafa 1981. 

Saunoa Matamua o lea ua agai sa’o lava fausia mai le tulafono o fanua ma suafa 2020 ae le’o atoatoa ( incomplete).
O loo malamalama foi le Minisitā I le tulaga faigatā o le taumafai o le Faamasinoga o Fanua ma Suafa e faaoga le tulafono o le 2020 i lona tulaga o iai nei ona e leai ni tulafono faatonutonu o iai e faaatoatoa ai le faaogaina o lea tulafono…faataitaiga e le o iai ni pepa poo forms faapea ai ma tau mo talosaga toe iloilo(apili). 

O tulaga ia o loo tete’e iai le finagalo o le Peresitene. Na saunoa Matamua o lea ua silamaimoa Samoa i le tusi a le Alii Peresitene e pei ona lolomiina i nisi o Nusipepa i le atunuu. O lea tusi o loo faailoa atu lona faagaulemalie atoa ai ma lona fo’i iloa i le tulafono sa ia tuuina mai iai i lana uluai tusi talosaga mai iai i le aso 15 o Fepuari.

O le saunoaga a le Tamaita’i Minisitā maumau pe ana lolomi atoa mai le tusi  peitai pei ua tuuina mai lava na’o itu o loo agai mai ia te ia.

O loo faapea mai le Peresitene o le Faamasinoga o Fanua ma Suafa. E iai aafiaga ogaoga faale tulafono o tulaga o loo talosaga atu ai le tamaitai Minisitā. Ma o loo manino ma malamalama le sopoia ai e le Kapeneta le tulaga e lē feaiaa’i ai malosiaga fefaatauagai o faigamalō e pei ona aiaia mai lalo o le Faavae o loo puipuia ai le Faamasinoga o Fanua ma Suafa e ala atu i le itu a le Faamasinoga…e mafai ai ona faagaioia ma galue e aunoa ma le fefe pe faaituau fo’i.

O loo faapea mai foi le Peresitene o le talosaga atu a le Tamaitai Minisitā ua solia ai le tulafono e ala lea i le taofia ai o le faamalosia o le tulafono…o se tulaga ua sosospo ai i le tulaga maualuga o le Palemene o ia e pasia tulafono…ma ua faapea foi ona sosospo atu i le tulaga tutoatasi o le Faamasinoga e ala atu i le Faamasinoga o Fanua ma Suafa latou te faauiga ma faitauina le tulafono.

Ua ia faapea mai foi na pau le tulaga talafeagai ma le mataupu a le Minisitā o le tuuina atu lea o ni teuteuga i le laualauafono a le Palemene e toe teuteu ai ia tulafono.

O le tulaga i le faaleaogaina o latou tofiga o loo faapea mai e leo iai se fuafuaga i le tulafono o le LTA 2020 e faaleaogaina ia tofiga pe a faaogaina le tulafono. E leo iai fo’i se tulaga faapea i pepa o faamatalaga o le pili sa tuuina atu i le Palemene …pe sa avea foi o se mataupu sa i faaaliga o finagalo (debate) pe sa toe tiotilo iai le Komiti  a le Palemene lea sa tuuina atu iai lea pili mo ana iloiloga.

O loo faapea mai le Peresitene o le faaleaogaina ai poo le aveesea o le filifilia ai o se tagata faigaluega e manaomia le faimetonu ma e faia ma le silafia lelei e le tagata…o le ala lea e le mafai ai ona maua i faamaumauga a le Matagaluega se fuafuaga e aveesea lona tofiga poo faamasino foi o le LTC ina ua faamalosia le tulafono LTA 2020.

O le vaega 67(6) o le LTA 2020 e lei fuafua e faatatau tonu i tofiga o Peresitene, Sui Peresitene ma Faamasino o le LTC ae sa faia mo Faatonu o le Faamasinoga.

Saunoa Matamua o loo ua tofia e le Fono Aoao Faitulafono le Komiti ia tilotilo pili nei na mafua ai tulafono e pei ona iai suiga nei i le Faamasinoga o Fanua ma Suafa.

Talu ai la lea tulaga e leai ni mafuaaga tatau o le a toe suia ai lana faaiuga na tuuina atu ai le tusi e talosaga ai le taofia o galuega a le Faamasinoga o Fanua ma Suafa.

Ae sa ia faamanino na te lei tuuina atu se faatonuga e faatatau i galuega a le LTC e leai foi se fuafuaga e sosopo atu le Malo i galuega a le Faamasinoga…e pei ona iai malosiaga fefaatauagai o Faigamalo.

Savings and transitional provisions:
(6) An appointment under the repealed Act that is not provided for in this Act is revoked at the commencement of this Act.