Ua lua ai nei aso talu ona tapunia Samoa ona o puipuiga lava mai le Koviti19. O se ripoti lata mai o le Ofisa o tapenapenaga o taimi o faalavelave matuiā, ua taua ai o loo tumau pea i le to’a 15 tagata o le pasese mai Brisbane Ausetalia ua faanofoesea i le nofoaga faapitoa i le maota gasegase i Motootua. 

O le asō, le amataga o le vaiaso e toe faia ai nisi suega poo test mo i latou faapea ma le pasese o le to’a 73 na tuanuu mai le malaga mai Brisbane i le Aso Lulu ua mavae o loo faanofoesea i nofoaga ua lautogia mo tagata e malaga atu i Samoa. 

O le feiloaiga ma le taitaifono o le komiti  o faalavelave faafuasei ma le Ofisa Sili o le Matagaluega o le Soifua Maloloina i le Aso Toanai ua mavae na faailoa ai faamatalaga auiliili  o le to’a 15 o lea pasese ua aafia i le vairusi,  faailoa e Leausa e leai lava ni vaaiga o aafia iai latou e pei o auga o le faama’i, o le fiva, tigā le faaiī ma tale ma tau faaletonu le mānava. 

O le tapunia ai o Samoa ina ia mautinoa le taofia o le pepesi o le faama’i aemaise lava o i latou ua aafia ma o loo faanofoesea ina ia faia pea test ma mautinoa ua kilia mo le saogalemu. 

O le faaiuga foi o le vaiaso na  saunoa ai le tamaitai Palemia ma faailoa le faaopopoga o le to’alima ua aafia lea e maua ai le aofaiga e to’a 15. O le maea ai o le 48 itula i le itula e 6 i le afiafi nei o le a toe silasila ai le Komiti ma le Kapeneta i se isi laasaga pe toe faaauau pea le tapunia pe o le a toe tatala le atunuu atoa i auaunaga masani.