Ua molia nei ma taofia i le vaaiga a leoleo tamaitai e toalua  faatasi ma le alii o Fauena Leautuli Toese Su’a poo Samuelu Leau poo Samuelu Piki ia poo Sam o loo ua lauiloa ai i le atunuu.

O Sam o loo molia i moliaga o le faia o faamatalaga  taufaaleaga e faaaogā ai auala o fesootaiga ma e faaono iai isi moliaga faaopoopo e faia, ae o le isi  tamaitai o loo molia i moliaga o le faalavelave i galuega a leoleo e ala lea i le faalafiina o Sam, e ono iai foi ma isi moliaga faaopoopo.

O le tasi o tamaitai nei o le toalua o le alii o Sam ma o loo molia i moliaga o le molimau pepelo ma le sese o faamatalaga e tuuina mai i leoleo.

O loo taofia pea i latou e leoleo e faatali ai le aso 20 o le masina o Fepuari e tutulai ai luma o le faamasinoga.

O Sam ua lata i le lima masina talu ona faalauiloa mai e leoleo o loo sailia ona o ni faamatalaga na ia faia e tuuaia ai le sui faipuile o Faleata 3 ia Lealailepule Rimoni Aiafi e faapea sa ia totogi atu ni tupe ia te ia, ma tuuina atu se laaumalosi na te tagatavaleina ai ni minisita se toalua o le Kapeneta.

E tele ni faasalalauga na faia e Sam ma ta’ua ai o ia sa iai i le po na maliu ai le talavou o Tuau Fasavalu i Vaitele i le aso 21 o Aperila, 2021.

Na ta’ua e Sam o ia sa vaaitino i le taavale na lavea ai Tuau atoa ai ma lē sa ia faafoeina lea taavale.

Sa tuuaia foi e Sam le Komesina o leoleo ia Auapaau Logoitino Filipo i lona faia o ni faiga faaalatua.

I le mae’a ai o nei faasalalauga na tuuina mai ai e leoleo se faalauiloa o loo sailia le alii o Sam, ina ia fesoasoani atu le atunuu pe a silafia, ma o le taimi lea e lei toe faalogo ai loa pe toe vaaia Sam i luga o le social media, peitai na amata mai ai i lea taimi le sailiga a le Matagaluega o leoleo.

Sa faailoa e le alii Komesina na to’ai loa tagi a ē o loo aafia i le tulaga na faia e Sam, ma ua lava foi mau, o le taimi loa lea na faagasolo ai loa galuega a leoleo na mafua ai ona maua, ma  pue mai ai loa Sam i le Aso Faraile na mavae nei, i le Maota o Ioane Viliamu i Tamaligi.