Ua pue e leoleo Kuiniselani alii e to’alua i le mae’a o le 18 itula o faataututū pea ma i laua ia i le Gold Coast. O le te’a laititi o le 11 i le taeao nei taimi Ausetalia na pu’eina ai i laua ia e leoleo mai se fale i le faaitu e ta’ua o Nerang i le Gold Coast.
Na mafua le mataupu lea ina ua agai atu leoleo e tuuina ia i laua ia poloaiga e toe foi ai i le falepuipui ina ua solia aiaiga o le tatala i tua. Na faasā ai e leoleo le faaitu lea mai lava i le afiafipo ananafi ma fautuaina tagata ia alofia le uia o lea faaitu a o feutaga’i ma i laua ia.
O nisi lipoti i le taeao analeila na ta’ua ai e foliga sa faaauupegaina i laua ia ma o loo tālia se isi lipoti lata mai mai leoleo e tusa o lea mataupu. Ua faamaonia mai foi e leoleo e lei iai se isi na aafia i lea mataupu ae ua faia nei su’esu’ega.
