Search
Search
Samoa-Police-Headquarters building

Popole le Matagaluega o Leoleo i le tulai mai o faalavelave e faaaogā ai laaumalosi

Ua faailoa popolega o le Matagaluega o Leoleo i se faalavelave na tulai mai i Sinamoga i le Aso Toonai na se’i mavae atu nei i le itula e 11 i le po.

I faamatalaga o lenei mataupu e faapea sa tulai mai i le vaega tonu o loo iai le kolosi i Sinamoga e latalata ane i le Falesa Metotisi a Sinamoga. 

E faapea faamatalaga sa faaaogāina ai e se tasi na malaga atu i se taavale se aupega malosi (fana) ma faapa i lea vaega ma faamanu’alia ai se alii talavou 21 tausaga o Sinamoga ma o loo taofia nei i le falemai i Motootua mai aafiaga i lona vae sa faamanu’alia.

Ta’ua e le sui komesina o Papalii Monalisa Tia’i Keti, na maua e leoleo le atigi ututau poo le casing ma o loo tau saili ai le ituaiga laaumalosi sa faaaogā.

Ua tuuina e leoleo i le itulau a le Matagaluega i le Facebook ni faamatalaga i se taavale ituaiga VANGUARD lanu uliuli, e tau sailia ai. 

O le numera o le taavale e amata i le R 5 ma e lei maua e i latou sa iai isi numera mulimuli o le laisene poo le number plate. 

Ua talosagaina e le Matagaluega soo se tasi na te silafiaina lenei taavale poo ni faamatalaga foi i lenei taavale ma le avetaavale faamolemole faafesootai mai le Ofisa Suesue Faapitoa i le numera 22 222 laina 1100, 1101, 1102, 1106 poo le imeli mai foi i le tuatusi – commissioner.sec@police.gov.ws

Tala sili ona faitaulia

TALA FOU MAI SAMOA

SAMOA UPDATE

PODCAST

Listen on

FAATALATALANOAGA

POLOKALAME A LEOLEO

Keep uptodate with Radio Samoa activity & promotion

* indicates required