O le suavai o se tasi lea o vaega e ta’ua i le soifuaga o le tagata ma o le tiute tauave lea a tagata uma ina ia mautinoa o loo faaaogā tatau le suavai a o utagia foi puipuiga ma vaega auā le maua pea o le suavai mamā mai punavai i nofoaga o loo tapue ai.
O le naunautaiga a le Vaega o Punavai a le Matagaluega o Siosiomaga ina ia malamalama alo ma fanau faia a’e i le tāua o le faaaogā tatau o le suavai maua.
O le Vasega 6 ma le 8 a le Tulagalua a le afioaga o Luatuanuu e pei ona tuuina i faamatalaga a le Matagaluega a le Siosiomaga, lea na oo ai lenei polokalame ia faatāua vaega o le fuafuaga o punavai a le afioaga.
O nisi o vaega sa agai ai lenei faamoemoe o le faailo lea o nei vaega o le siosiomaga ina ia faaauauina pea e tua ai aiga, ia silafia foi le tāua o gaioiga a tagata taitoatasi e ala lea i le puipuia o punavai faasao ma ia amanaia le sao o tupulaga laiti i le puipuia o le siosiomaga.
O le manulauti a lenei Vaega o le Matagaluega ia latou auaunaga faatino pea ina ia mautinoa o loo mafai ona maua e aiga uma i afioaga taitasi le lelei o le suavai maua pe a moomia ina ia mafai ona ausia le tulaga o le soifua maloloina ae le gata i lea o le itu i le siosiomaga ma atina’e mo le tamaoaiga.
