Poloaiga mai le Ao o le Malo e toe fai le faigapalota

Ua tuuina mai le malelega a le Ao o le Malo afioga ia Tuimalealiifano Sualauvi II i le itula e 6 i le afiafi nei (taimi niusila) lea ua atofa ai le aso 21 o le masina o Me o le a toe fai ai le faigapalota a Samoa 2021.


Faamanino mai e le Ao o le Malo o le ala o lenei faaiuga ina ia vave maua se vai fofo i le lē mautonu ua iai nei.
Taua e le Ao o le Malo e oo mai i le taimi nei e leai se tulaga mautu o se faigamalo a Samoa aua o loo tutusa pea fogāvaa o vaega faaupufai e lua le HRPP ma le FAST i le ta’i 26 o ona sui a faipule.


Taua foi e Tuimalealiifano ua salalau i luga o upega tafailagi tusitusiga ua aafia ai le tulaga tutoatasi o le faamasinoga , ae le gata i lea o le taumafai ina ia puipui le tauleleia o le faamsinoga i le atunuu.


O le isi mafuaaga o le tausaga faaletupe e faaiu lea i le Aso 30 o Iuni o tausaga taitasi ae toe fotua’i le isi tausaga faaletupe i le aso muamua o Iulai, afai ae faaauau pea le lē mautonu o se faigamalo o le a telē le aafiaga o le tamaoaiga a le atunuu e ala i ana paaaga mai fafo ma isi fuafuaga fai mo Samoa ae le gata i lea o le itu tau aoaoga a fanau a le atunuu.


Na ia taua foi o le taimi nei e 28 tagi i mataupu faatosina o le palota ua tuu atu nei i luma o le faamasinoga ma o le a umi se taimi e tālia ai faaiuga o nei faamasinoga ma o le a faaauau pea le lē mautonu o le atunuu.


Taua e Tuimalealiifano ua maea foi ona feiloai ma taitai o vagea faaupufai e lua ma faailoa ai le auau o lea fuafuaga.


O le tuuina mai ai o lea poloaiga a le Ao o le Malo ua faaleaogaina uma ai tusi faamaonia o filifiliga na tuuina atu i le Aso 12 o Mati 2021, Aso 16 Aperila 2021 faatasi ai ma le tusi  faamaonia o le filifiliga na tuuina atu i le aso 20 o Aperila 2021.


O le tatalo a le Ao o le Malo ia tumau pea i luga o Samoa le filemu o le Atua ao alo atu ai i lea faiga filifiliga.

Share on facebook
Share on twitter
Share on email
Share on whatsapp

LAUILOA

Keep uptodate with Radio Samoa activity & promotion

* indicates required