Ua iai suiga i tau o oloa tau suauu ma penisini mo lenei masina fou i lo tatou atunuu e pei ona faailoa e le tamaitai Minisita o Tupe le faaitiitia o le tau o le lita mo le penisini, suauu kiso ma le kalasini.

E fua lea faaitiitia poo le pa’ū o le tau o ia oloa i masina ua tuanai sa fai si maualuga ai o latou tau.

Faaalia e le minisita le afioga Mulipola Anarosa Ale Molioo o le pa’ū o le tau o le suauu lē faamamāina i le masina o Tesema o le tausaga na tea nei ma le siitia o le aogā o le tala Samoa i le tala Amerika o mafuaaga ia ua fesoasoani tele i le faapa’ūina o le tau o ia oloa i Samoa mo le masina lona lua o lenei tausaga.

O le penisini sa 3 tala 35 sene i le lita ua tifa ane i lalo i le 3 tala 3 sene i le lita. O le suauu kiso sa 3 tala 96 sene i le lit aua alu ifo i lalo i le 3 tala 52 sene i le lita, i le male kalasini o lea ua faaitiitia foi lona tau i le 3 tala 11 sene i le lita, faatusatusa i le tau sa iai i a Tesema sa 3 tala 49 sene i le lita.

O tau fou ua faailoa lautele ua maua ai se faamāmā avega mo le au fai taavale.