Ua pa’ū maualalo le tulaga o galuega faatusitala ma faasalalau i Samoa i lenei tausaga e pei ona faailoa i le faatulagaga o atunuu o le lalolagi e ala i sailiiliga ma faamaumauga a le faalapotopotoga faavaomalo o tusitala e ta’ua o le Reporters without borders.
O le tausaga ua mavae na maualuga le tulaga o Samoa e 21, ae o le tausaga nei ua pasasa i lalo i le tulaga 45, o lona uiga e 24 sitepu ua palasi ai i lalo. E ui i lea suiga tele e tusa o lea sailiiliga ae o loo sili atu ona lelei le tulaga o loo faatino ai lea tautua i lo tatou atunuu pe a faatusa i isi motu laiti o le Pasefika e pei o Fiti o loo saofai i le tulaga 102, o Papua Niukini e 62, ma Tonga o loo tulaga 49.
O Niu Sila o loo pito maualuga lona tulaga e 11 ae o Ausetalia o loo tulaga 39. O loo manino i le taunuuga o le sailiiliga lenei o loo sili ona tu maualuga Samoa i le pitolaau faatino a tusitala ma le aufaasalalau i le li’o o Malo laiti o le Pasefika e lē aofia ai Niu Sila ma Ausetalia.
O loo tele lu’itau o loo feagai ma lea tautua e le gata i Samoa ae o isi atunuu o le Pasefika ae lē faatusalia ai lu’itau ma’ale’ale o feagai ma i latou ua ofoina o latou soifua i le galuega i isi atunuu o le lalolagi ua faamata’uina ai lo latou saogalemu, ma o nisi lava ua fano ai ola ma soifua.
