E ono iai se isi faamāmā avega atili i le lalata atu i le kerisimasi pe afai e toe pa’ū atili foi le tau o le penisini i le atunuu.
O le pa’ū i le tau o loo faatauina ai i atunuu i fafo ua mafua ai foi ona pa’ū le tau o le penisinisi i Niu Sila nei.
O le faamatalaga a le sui o le AA i le Breakfast Show i le taeao ananafi, Terry Collins na ia ta’ua ai o se tulaga lelei tele lenei mo le au fai taavale ma ua faasolo foi ina malosi le tālā Niu Sila ma ua faaitiitia foi le tau totogi mo le aumaia o le penisini i le atunuu.
Ta’ua e Collins o le itu lelei ona o le a silasila loa i le masina fou o Ianuari, o le a faaauau atu agai iai le faaitiitia o le tau o le penisini i se taimi o loo feagai pea le toatele ma faigamalologa.
Pe a fua i faamaumauga i le aso ananafi, o le tau o le penisini 91 unleaded o loo i le $2.76 i le lita i le tele o pamu, $2.96 i le lita mo le penisini 95 ma le $3.08 sene i le lita mo le penisini 98.
O le kiso o loo i le $2.19 sene i le lita, o tau ia ua faaitiitia uma talu mai le masina na tea nei.
