O le asō e amata ai polokalame a le SCOPA NZ e faamanatuina ai le 70 tausaga talu ona faavae mai le Kolisi o Samoa.
E le o se taimi muamua lenei ua faamanatu ai e le SCOPA nisi o tausaga iloga e aulia e le kolisi, peitai o le toe faamanatu ai o le 70 tausaga talu ona faavae mai le Kolisi o Samoa, na saunoa le susuga i le Peresitene o le SCOPA NZ, le afioga Leaupepetele Tala’i Jr Lene, ina ua fesiliga e le sui o le Radio Samoa, “O se avanoa e mafai ai ona toe mafuta faatasi teine ma tama tuai sa aotauina i le Kolisi o Samoa e faasoa ma faaolaola le olaga tautua auā ni fesoasoani mo le Aoga aemaise galuega faatino a le SCOPA NZ.”
Ta’ua foi e le peresetene, “O le polokalame o le faamanatuina o le 70 tausaga o le Kolisi o Samoa e pei ona tapenaina, ua fuafuaina foi e faailo ai ma amanaia sui matutua o le asosi i Niu Sila nei, o i latou sa lagolago pea ma fesoasoani i meafai a le SCOPA NZ i le 5 tausaga talu ai.”
I polokalame, o le itula e 3 i le aoauli nei o le Lotu Faafetai ma le Feiloaiga o le 70 Tausaga i Malaeola.
O le aso a taeao i le itula e 7 i le taeao, o le faamalositino i le Manukau Tennis Court ma le Malu o le Taeao, ma taualuga ai loa i le taumafataga i le afiafi lava a taeao.
