E to’alua Katinale o le a fai ma sui o le Pasefika i le potopotoga e sa’ilia ai se isi Pope fou o le Ekalesia Katoliko i le Vatikana.

O le masani a le ekalesia i taimi faapea, o katinale uma e i lalo ifo o le ta’i 80 tausaga le matutua e mafai ona palota mo le Pope fou.

I lona tuufaatasiga e pei ona lipotia i le RNZ, e 252 Katinale a le ekalesia i le lalolagi ma ua faailoa o Katinale Mafi mai Tonga ma Katinale Ribat mai Papua Niu Kini o le a faimalaga i Roma mo lea faamoemoe.

Ua ta’ua i se faamatalaga mai le Katoliko i Papua Niu Kini o se faaaloalo maualuga le auai ai o se sui o Papua i le filifiliga o le isi ta’ita’i o le Ekalesia auā e le’i leva nei ona tofia foi e Pope Francis le latou Katinale o loo iai nei.

Sa asia foi e Pope Falanisisi PNG ia Setema i le tausaga talu ai ma ua faailoa e le Palemia, James Marape o lona malaga ane na toe faaosofia ai le to’atele o tagata lotu e savavali ma le Atua.

Ua faailoa foi i le lipoti a le leitio faavaomalo a Niu Sila o Father Paulo Filoialii mai Samoa o ia le ulua’i tagata Pasefika na faia ana su’esu’ega i Roma ma faatino ai le ulua’i misasā Samoa i le Vatikana i lona faauuga i le 1990 ma ua ia molimau o le taimi lea sa avea ai Pope Falanisisi o lona faia’oga.

Puna o Faamatalaga: https://www.rnz.co.nz/international/pacific-news/558845/pacific-cardinals-heading-to-rome-for-vatican-conclave