O kulupu e umia eleele i East New Britain i Papua Niu Kini ua o latou tapunia le Liguria Oil Palm Mill ina ua lē faamalieina i tuutuuga e 8 sa tuuina iai e le faigamalo a le atunuu e tatau ona ausia.

O ia tuutuuga sa tuuina i le East New Britain Palm Oil Ltd lea e umia le mill poo le falegaosi oloa lea ma sa tuuina iai ona o popolega mai le aufaifaato’aga na feta’ua’ina ai le fesuia’i o le tau o a latou auaunaga.

O le asosi a le aufaifaato’aga le Pomio Oil Palm Growers Association na o latou faailoa o le a faaauau pea ona tapunia le mill lea se’ia maua se tali mautū mai le kamupani.

Ua mae’a faailoa foi e le ta’ita’ifono o le asosi lea i le RNZ ua oo atu le latou faaaliga i le kamupani e ana le mill lea ma faailoa iai o le a ave e le malo i le tulafono pe a lē usita’ia tuutuuga ua faamatuu atu iai.

E aofia ai i ia tuutuuga le toe totogi ane o le lata i le $9 miliona Amerika o loo aitalafu ai i ē e ana le fanua faapea le aufaifaato’aga, ae lē gata i lea ia iai se isi faiga fou o a latou tau ia penefiti ai le aufaifaato’aga.

O le isi foi mill e umia e le kamupani lava lea ae i le isi itu o Papua ua lipotia e ono feagai foi ma le faafitauli lava lea i le lumana’i.

Puna o Faamatalaga: https://www.rnz.co.nz/international/pacific-news/561428/png-landowner-groups-shut-down-oil-palm-mill-in-east-new-britain