Ana faapea nei e faia le palota tele a Niu Sila ananafi, o lona uiga ua toe foi mai le Labour.
O le iuga lea o le palota faapolokiki a le 1News lea na tau fai pa’ūū uma ai pati e tolu o loo osia le faigamalo tuufaatasi a Niu Sila o loo iai nei, poo le palota lenei na suesueina ai tagata palota agavaa e 1000 i le va o le aso 20 ma le 24 o Aperila.
O le National o loo tumau pea o le pati tele i totonu o le Palemene e umia le 36% o party votes, peitai ua pa’ū le 2% pe a faatusa i le palota faatoa uma atu a le 1News.
O le NZ First, ua pa’ū i le 4.2% ma ua lē ausia ai le 5% lea e mafai ona foi mai ai i le Palemene.
A tuu mai i nofoa o le maota, o lona uiga e na o le 57 nofoa e maua e le National ma le ACT ma ua lē ausia le 61.
Ae i le Labour, Greens ma le Te Pati Maori, o loo iai le avanoa e mafai ona o latou tutu faatasi ma maua nofoa e 64 ma o loo telē le mafai e osia ai le isi faigamalo.
I saunoaga a Chris Hipkins o le taitai o le Labour, o se toe fafagu i le faigamalo le palota lenei ona ua amata ona sese le itu e agai iai, ae tali le Palemia Christopher Luxon, o le auga lava ia o palota faapenei e alu i luga ma sau i lalo.
Puna o Faamatalaga: Poll: Labour could return to power if election held today (1news.co.nz)
