Ua avea nei le itumalo o Sagaga 2 ma se isi itutino tāua o polokalame a le Toomaga mo e Puapuagatia, e lagolagoina taumafaiga uma e tetee atu ai i soo se itu’aiga o sauaga e aafia ai le soifua saogalemu o tinā ma tama’ita’i ma fanau o le itumalo.
E fā tausaga o le fesoasoani a Malo ‘aufaatasi ua lagolago ai ile Toomaga mo le faia o polokalame faalauiloa e ‘autū i le tafi esea o sauaga, ma ua sainia ai le māliega i le va o le sui faipule o Sagaga 2 o se tasi o Minisita o le Kapeneta le tōfā, Fata Ryan Schuster o lana komiti ma le faalapotopotoga o le Toomaga mo e Puapuagatia.
O le māliega ua saini e ala i se Memorandum of Undestanding poo se M.O.U, o le a galulue faatasi ai le itumalo ma le Toomaga o loo nafa ma polokalame faalauiloa aemaise ua ogatasi lea maliega ua sainia ma polokalame o le 16 aso e tete’e atu ai i sauaga o loo faatino i le taimi nei e lea faalapotopotoga. Ua iai nisi o itumalo ua mae’a sainia foi lea maliega ma ua auai foi i le polokalame o le tetee atu i sauaga.
