E ono lē o toe mamao se taimi ae amata ona faasaoloto e Ausetalia tagata sulufai mai nofoaga o loo taofia ai ina ua mae’a tuuina mai se faaiuga mai le faamasinoga maualuga e tusa o lea tulaga. 

O le faaiuga e pei ona lipotia e le 7News ua ta’ua ai e solitulafono le faiga lea o le faanofo o le tagata i le nofoaga o faasalaga mo se umi e lē mailoa.

O le taimi nei e toa 92 tagata o loo taofia i lea nofoaga ua lē mafai ona toe foi i o latou atunuu ma e ono mafai la ona faasaoloto i lalo o lea faaiuga, atoa ai ma le isi 340 o loo iai faasalaga faaumiumi.

Na saunoa le minisita o femalagaa’iga, Andrew Giles o loo silasila ma le toto’a le malo i lenei faaiuga ma o le a galulue pea ma leoleo e faamautu le saogalemu o le komiuniti.