O se tasi sui sinia o le malo tele o Amerika ua ia faia se faamatalaga faapea e i’u lava ina avea Niu Sila ma sui o le AUKUS poo le maliega o loo aofia ai Ausetalia, United Kingdom ma Amerika e faatatau i le fesoasoani o ia atunuu ia Ausetalia i le maua ai o ni vaa maulu faaniukilia.
O le fonotaga a le Palemia o Niu Sila ma le sui failautusi o le malo tele o Amerika, Wendy Sherman ua ta’ua ai e le tamaitai failautusi o Niu Sila o se paaga tāua tele a Amerika i le Pasefika.
Na ia ta’ua foi i le lipoti a le Televise tasi sa faia mai lava le faamatalaga a Amerika o le a aga’i i luma ma silasila foi i nisi o faiga faatekonolosi o loo alia’e ma o latou uiga i le puipuia o tagata ma o Niu Sila le isi atunuu e ono faatalanoaina i tulaga faapea pe afai e alia’e ae fai lava e le atunuu ia lana faai’uga e fua i le paketi tau le puipuiga ma lona agavaa.
E lē o faailoaina i le lipoti se finagalo o le Palemia i lea mataupu.
