E 5000 laau toto i totonu o le lua ma le ‘afa itula ma na mafai ona faia e tagata Kalaiesetete e toe faaolaola ai se tasi o ona pitonuu na faaleagaina e mafuie. 

O ananafi na tutu faatasi ai le tusa ma le 350 tagata na ofo fua atu o latou taimi mo le Forever Trees i Kalaiesetete, ma o se polokalame o loo tutu malosi ai le Council, Trees that Count faapea ma le Conservation Volunteers NZ. 

O le fanua lenei i Burwood na iloga ona matuai faaleagaina e mafuie i le 2010 sau i le 2011, ma mai i lea taimi na tuu uma ai i lalo fale na faaleagaina sa iai ma ta’ua ai loa o se tasi o fanua i lalo o le sone lanu mumu po ua lē toe saogalemu. 

Mai le toatele na iai ananafi o se fiafiaga le mafai ona omai faatasi ma a latou fanau e faia lea galuega lelei ma o se aoaoga lelei foi lea mo le fanauiti aemaise ai o se sao mo le siosiomaga.