Poloka le auala i le agai atu i le maota fono.
Poloka le auala i le agai atu i le maota fono.

Poloka le auala ma ua lē mafai ona ulufale sui o le HRPP i le malae i Tiafau

E faitau selau i latou na auai e lagolago le savali o le filemu a sui o le vaega faaupufai e Puipuia Aia Tatau o Tagata le HRPP lea na faamoemoe e auai atu i le tauaofiaga o le Palemene lona 17 o Samoa i le taeao nei.

Peitai pe 200m le mamao mai le falefono na taofia ai e Leoleo lea savali ma sui faipule filifilia uma a le HRPP ona o faatonuga mai le Fofoga Fetalai.

O Lea poloka na matuā siomia le malae i Tiafau ma e lei faatagaina se tasi e sopoia lea vaega seia vagana ai sui o le faigamalo fou, o faauluuluga o le matagaluega a le malo faapea leoleo e ala i le faatinoga o le latou galuega.

Taua e le leoleo sinia na taofia lea solo a le HRPP, o loo faatino le latou galuega e ala i faatonuga mai le Fofoga Fetalai e pei ona tuu atu ai lana tusi i le aso ananafi e lē mafai ona faatautoina sui a le HRPP ma o le a lē mafai foi ona ulufale i totonu o le maota fono.

O se gaioiga na taua e Tuilaepa Lupesoliai Sailele Malielegaoi “O se aso faanoanoa mo Samoa.”

Na ia taua foi talu ona tulai mai le tofi Palemia i le tele o tausaga ua tuanai o le taimi muamua lenei ua taofia ai le ulufale atu o sui filifilia i totonu o le falefono.

O nofoaga na faasaina e aofia ai le maota o Tofilau Eti Alesana le fale o le Palemene, le malae i Tiafau ma soo se fale poo se malae e umia e le Ofisa o le Fono.

E ui i le tele o vaega na tulai mai i fafo o le maota fono e le’i taofia ai le tauaofiaaga lona 17 o le Palemene a Samoa.

Share on facebook
Share on twitter
Share on email
Share on whatsapp

Keep uptodate with Radio Samoa activity & promotion

* indicates required