Brianna Fruean
Brianna Fruean

O upu e avea ma aupega e faasaoina ai pe fano ai foi.

Tusia : Maina Vai


O le vaiaso nei na faafofoga ai le lalolagi i le faasoa a le tamaita’i Samoa ia Brianna Fruean 23 tausaga o le soifua, na ia tuuina atu i le tatalaga o le fono lona 26 a Malo Aufa’atasi (COP26) mo mataupu faatatau i suiga  o le tau lea o loo usuia ai nei i Glasgow, Scotland, United Kingdom mai le aso 31 o Oketopa i le aso 12 o Novema o le tausaga nei.

I le aotelega o ona manatu i lana folasaga e tuuina atu ai se matuupalapala mo taitai uma o malo o le lalolagi o loo auai, na ia faaoga ai le taua o upu poo tala ma lona malosiaga na te suia se mea…..

“I la’u aganuu i lo’u atunuu o Samoa e iai le muagagana ‘E pala ma’a ae  le pala upu’, faailoa e Brianna o upu taitasi uma e faaoga ua faamamafaina e mafai ai e se upu e tasi poo se fuainumera ona toe faatulaga le lalolagi. E iloa ai le eseesega tele i le taumafaiga ma gaioiga e tali atu i suiga o le tau atoa ai ma le taumafaiga ia aua nei faaituau pe faapolokiki gaioiga uma ma taumafaiga ae ia laugatasia tagata uma.

Sa ia faailoa fo’i o loo i taitai uma o malo aufaatasi le malosiaga e faaleleia… ma ia manatua i a latou fonotaga o faamaumuga uma e leo nao se laupepa paepae ma se vaitusi lanuuliuli, ae i a latou upu latou te mafai ona faaogaina o se aupega e faasaoina ai tatou pe faatauina atu ai fo’i.

Sa faamanatu foi e le tamaita’i Samoa e le tau faamanatu i le lalolagi lo tatou aafiaaga…”Afai o e i totonu o lenei potu ua e silafia le uiga o suiga o le tau ma lo matou aafiaga…e te le manaomia fo’i o’u tiga ma o’u loimata e faailoa ai ia te oe o loo matou iai  i se tulaga pagatia”

“Ae o le fesili moni lava pe o iai i le tulaga o faiga faapolokiki le mafai e faatinoina ai le mea sa’o ma faaoga upu sa’o e mulimulitaia ai le tele o gaioiga ua leva ona tuua mai”. Faailoa e Brianna i le COP26 afai o tau saili se faaosofiaga i tulaga tau taitaiga i mataupu nei o suiga o le tau, e tatau ona tagai mai i tagata o le Pasefika. E le gata o tagata o loo aafia ma pagatia ae ose sulu o  faamoemoega.

“O se tupulaga mai le Pasefika e ao ona ou faapea atu matou te le’o goto ifo ae o loo matou finau atu pea”Sa faailoa e Brianna i le BBC News ina ua maea lana folasaga, e faapea  talu ai sa ma vavao o le Koviti 19 e toaitiiti le au fono a le Pasefika na mafai ona oo atu ma sa ia alu lava ma lona leiloa pe faafefea ona toe fo’i mai ona o femalagaiga o loo tapunia ai le tele o atunuu o le lalolagi. 

E ui i lea sa ia faailoa e taua le faafofogaina o se leo ma o upu fo’i sa ia faasoa atu ai ua le na’o ia e onaina ae mai atumotu taitasi uma o le Pasefika.

Share on facebook
Share on twitter
Share on email
Share on whatsapp
Scroll to Top

Keep uptodate with Radio Samoa activity & promotion

* indicates required