A’o faagasolo ai le aso lona lua o le tauaofiaga o le Palemene lona 17 e lei mafai lava ona agai i totonu o le falefono sui faipule filifilia a le vaega faaupufai e Puipuia Aia Tatau o Tagata le HRPP.
Na vaaia le faatumulia o fafo ane o le falefono i le malae o Tiafau i Mulinuu i sui o lea vaega faaupufai a le HRPP ma tagata lagolago ae faapea foi malu o le Mālō o loo faia pea le latou galuega.
O se vaaiga faamomoi loto i le tulivae ai o le auauna le Atua le susuga i le faafeagaiga tau i le lagi ina ia tatala le falefono mo sui filifilia o isi itumalo e pei ona tofia ai i le palota tele i le masina o Aperila.
Na auai atu foi le Fono a Ekalesia Soofaatasi a Samoa i le maota fono ae le gata i lea na faatino e le taitai o le Ekalesia Katoliko i Samoa lana afioga i le Akiepikopo Alapati Lui Mataeliga faatasi ai ma faafeagaiga o le Ekalesia Katoliko se ifoga i fafo ane o le fale o le Malo i Eleele Fou e talosaga mo se filemu o le atunuu.
E pei ona silafia o le Aso Gafua 13 o Setema na tuu atu ai se tusi a le Fofoga Fetalai i le taitai o le HRPP susuga Tuilaepa Lupesoliai Sailele Malielegaoi ma lana vaega faaupufai e faailoa ai sona finagalo e tusa ai ma le talosaga a Tuilaepa ina ia faatautō i latou i le tauaofiaga o le Palemene lona 17 a Samoa.
Peitai o le tali a le susuga Papalii Li’o Taeu Masepau talu ai ona o loo tumau le tetee o le HRPP i le faaiuga a le faamasinoga talosaga apili o le ala lea o le a lē taunuu ai se latou faatautoga ma e lē taliaina foi i latou i totonu o le falefono.
Na taunuu atu foi le afioga i le tama aiga le Ao o le Mālō o Samoa Tuimalealiifano Vaaleto’a Sualauvi II ma feiloai atu ia Tuilaepa ma le vaega faaupufai ona agai lea i totonu o le falefono ao faagasolo ai pea talanoaina o mataupu o le Palemene a le Mālō fou o le Faatuatua i le Atua Samoa ua Tasi.
