Ua faalautele mai se faamalamalamaga a le tamaitai Pule Faatonu poo le Regulator a le malo, Lematua Gisa Fuatai-Purcell e faamautinoa mai ai, ua faamalieina uma e le BlueWave Wireless mana’oga sa faatalosagaina e le ofisa o le Pule Faatonu ina ia tuuina atu faamatalaga uma tau tupe a le kamupani ma ina ia utagia atoatoa le Telecommunications Act 2004. 

O se pepa o faamataga na faamatuu mai i le itulau o le fb a le Government of Samoa lea o loo saunoa ai le tamaitai Pule Faatonu, E tele ni tusitusiga i nusipepa ma isi auala o faasalalauga  i le lua vaiaso talu ai, na faasalalau ai ni masalosaloga ma fesiligia ai le faamaoni o le kamupani a le BlueWave Wireless i le faatinoga o le latou auaunaga aemaise pe o utagia tuutuuga faaletulafono. 

Saunoa Gisa, o lona tiute o le Pule Faatonu, e tatau ona ia faamanino mai soo se faamatalaga na puna mai le aufaasalalau, ina ia aua ne’i iai se nunumi i le silafia e le atunuu, o lea sa usitaia atoatoa e le kamupani tuutuuga ma mea na mana’omia e le Ofisa o le Pule Faatonu, ma tuuina mai uma a latou faamaumauga faaletupe mai le vaitaimi o 1 Iulai 2020 e oo atu i le aso 30 Iuni 2021. 

Na ta’ua e le Pule Faatonu nisi o tusitusiga i le Samoa Observer sa lomia i le aso 5 ma le aso 7 o Iulai 2022, e lē sa’o atoatoa ai ona otooto mai le mataupu talu ai o le Order No. 2022/T03 sa tuuina mai e le ofisa o le Pule Faatonu sa toe faalēaogāina ai le poloaiga muamua atu No. 2022/T02 na sese ona tuuina atu a o toesea ai le Pule Faatonu mai le atunuu. 

Na toe faamamafa i saunoaga a le Pule Faatonu le tulaga o le uia uma e le BlueWave Wireless o aiaiga uma o le galuega o le a latou faatinoina i aoga e pei ona iai le sootaga o le initaneti o loo tapena atu i ai mo aoga uma o le atunuu. Ma o le faamautinoaga a le Ofisa o le Pule Faatonu, o loo sosolo lelei uma taiala ma galuega a le kamupani e tusa ai o tulafono faatonutonu o mea tau fesoota’iga, ma o loo faagasolo siaki ma isi vaega uma ina ia faamautinoa le puipuiga malu o fanau mai nisi o itulau lē  lelei i luga o upega tafailagi.