O le aso ananafi na taunuu ai i laufanua o Samoa le Sui Komesina o Tonga, Tevita Vailea ma nisi o sui o le Matagaluega mo aoaoga faatekonolosi (PolicePro System).

O se tasi o polokalame faatekonolosi ua faaaogāina e le Matagaluega o Leoleo, Falepuipui ma le Toefuata’iga auā faamaumauga o mataupu e tulai mai i lea aso ma lea aso, faapea faamaumauga o i latou o loo aafia i soligatulafono ma mataupu e alia’e mai.  

Ua faamauina i faamatalaga mai le itulau a le Matagaluega o Leoleo, Falepuipui ma le Toefuata’iga, mai le Pasefika o Samoa le uluai atunuu ua faaaogāina lea polokalame faatekonolosi mo a latou galuega faatino, sosoo atu ai ma Nauru, ma o lea ua agai Tonga e faaopoopo i totonu o a latou auivi ma fuafuaga mo galuega faatino i le faamalosia o tulafono i totonu o lo latou atunuu.  

I se feiloaiga a nei sui ma le Matagaluega o Leoleo, Falepuipui ma le Toefuata’iga, na faafeiloai ai e le alii Komesina, Auapa’au Logoitino Filipo le Sui Komesina o Tonga ma lana auvaa, sa faapea foi ona ia faailo ai lona agaga faafetai i le maua pea o sootaga ma ana paaga mai le Pasefika e pei o Tonga auā taumafaiga e malupuipuia ai pea itu o le Pasefika. 

Na faaalia foi e Auapa’au le tuu atu pea o le tau’au fesoasoani i ana paaga mai le Pasefika auā a latou taumafaiga e puipuia o latou tagatanuu.  

Na faaleo le agaga faafetai o le Sui Komesina o Tonga, Tevita Vailea i le Matagaluega o Leoleo, Falepuipui ma le Toefuata’iga mo le taliaina o Tonga i nei foi aoaoga.

Na faasoa Tevita, o lo latou agaga faafetai ua maua so latou avanoa e lē gata o le aoaoina o le tomai, ae o se faalogologo foi ma faasoa i auala e saga faamausalī ai a latou taumafaiga mo le malupuipuia o tagatanuu. 

Ua faamauina i lea feiloaiga, ua fai ma faamaufaailoga i le galulue soosoo tau’au pea o Matagaluega o Leoleo o le Pasefika ina ia malu o latou atunuu faapea atunuu tu tuaoi.