Ua tauaaoina nei e le faamasinoga le talosaga a le sui tauva a le vaega faaupufai a le Faatuatua i le Atua Samoa ua Tasi mo le itumalo Falealupo ia Fuiono Tenina Crichton e fesiligia ai le agavaa o le isi sui o loo tauva mai lava i lea itumalo mo le palota laititi.
E pei ona silafia o le itumalo Falealupo e atoa iai le 7 o itumalo lea ua toe foi e fai faigapalota laititi e saili ai o latou sui faipule ma o le susugu a ia Fuiono ua ave lana talosaga i le faamasinoga faasaga i le agavaa e tauva ai le sui o le vaega faaupufai e Puipuia Aiā Tatau o Tagata le HRPP le susuga Tuitogamanaia Peniamina Leavai.
O le susuga a Fuiono na ave foi lana tagi o faatosina o le palota i le maea ai o faiga filifiliga tele a le atunuu i le masina o Aperila faasaga o le tamaitai na manumalo mai i lea itumalo ia Leota Tima Leavai.
O lea mataupu na i’u ina faamavae ai Leota Tima Leavai ma toe foi ai loa e fai le faigapalota laititi lea o loo loma nei. O le Aso Faraile nei na valaau ai le talosaga a Fuiono i luma o le faamasinoga maualuga.
