E iai nuu e uma ane e lē toe iai ni auaunaga a femalagaa’iga lautele e oo iai.
O le lapataiga lea mai le puleganuu a Aukilani e mafua i le faaitiitia o tupe o loo faatupeina ai auaunaga nei.
O le aso ananafi na toe talanoaina ai fuafuaga o loo sau ai e faaitiitia i le 10% tupe tuuina mai e faatupe ai femalagaa’iga lautele e faatusa i le tausaga e 2021.
O le popolega o le puleganuu a Aukilani afai ae faaitiitia tupe faaagaga mo femalagaa’iga, o lona uiga e lē toe maua e le NZ Transport Agency (NZTA) le va o le $80 agai atu i le $500 miliona.
O se mataupu ua vaavaai ai nei i le toe sii o le tau o pasese e ui i le faigata o le taugata o le tau o le soifuaga o loo iai nei ma mai nisi o sui na iai i ia talanoaga o tagata Aukilani, Maori faapea tagata Pasefika o le a tele ina aafia ai.
E lua lava itu na talanoaina e le puleganuu, o le sii o pasese poo le lē toe maua e nisi o nuu Aukilani o auaunaga tau femalagaa’iga lautele, ma mai le Auckland Transport e lē o iloa poo ā nuu o loo vaavaai ai.
