Ua alia’e nisi faamatalaga i lipoti a le aufaasalalau i le asō e faapea o le pepe lea na lipotia i le amataga o le vaiaso ua uma lona ola mai le itu i Sisifo o Sini, sa aafia i le koviti i le taimi na uma ai lona ola.
O le pepe teine e pei ona lipotia sa aafia i le koviti ae fai mai foma’i e lē o mailoa ma faamautu tonu mai le mafuaaga o le uma o lona ola.
O le vaega o fesoasoani faavavave na valaau ane i le fale lea i Yindi Place i Doonside i le Aso Gafua o le vaiaso nei ma maua ai le pepe e pei ona ta’ua, sa faia ia togafitiga e paramedics i lea nofoaga peitai e le’i manuia.
Lea la ua faailoa i lipoti lata mai o le mataupu lea o le pepe faatasi ai ma ona mātua na aafia uma i le koviti. E ui la i lipoti ia o le pepe na aafia i le koviti ae o loo ta’ua foi o loo vaavaai pea leoleo ma tau faamautu le mafuaaga o le maliu ma tālia foi lipoti i su’esu’ega sa faia. E na o le iva masina o si teineititi ua aafia.
