Ua faamauina le sainia ai e le alii taalo o Ardie Savea lana konekarate ma le ‘au a le Moana Pasifika mo le isi 3 tausaga.

O se tala fiafia mo le toatele o tagata Samoa, aemaise le alii o Laauli Michael Jones, e pei ona ia faaalia i se faatalanoaga ma le aufaasalalau.  

I lea faatalatalanoaga ma le aufaasalalau na faasoa ai le alii o Ardie, ua fai sina leva ona iai ona faanaunauga e fai ma avefu’a a Samoa, ae mo le auai atu i le Moana Pasifika o se faai’uga na ia ta’ua o se vaega ua ia faia e sa’afi ai ona mātua ma tuaa o ona mātua ma le tele o galuega lelei na o latou faia mo ia ma lona uso o Julian.  

Ae ina ua fesiligia e aufaasalalau le alii i nisi o vaega o le a ia tulimata’i i le auai ai mo le ‘au, na tali le alii taalo, o le a mafai ona faamanino ma taumafai e aveese manatu sese o loo faaalia e le toatele i le Moana Pasifika.

O le ‘au o le Moana Pasifika o se ‘au malosi ma le mata’ina.

O le tausaga fou o le a amata ai le konekarate a lea alo o le atunuu mo le Moana Pasifika.

O lenei alii, sa taalo mo le ‘au a le Hurricanes mo le 11 tausaga ma sa avea foi o ia ma kapeteni o le ‘au, faapena foi mo le ‘au a le All Blacks, ma i le taimi nei o loo avea o ia ma sui kapeteni o le ‘au tele a Niu Sila.