O le faasilasilaga na faia e le Palemia i le taeao ananafi, lea na faasilasila ai e Christopher Luxon le faia mai i le malae i Eden Park i Aukilani i le tausaga fou 2027 se tasi o taaloga a le State of Origin, o se tala sili ona fiafia lea mo le aai o Aukilani.
E lē gata i le siitia ai o le tamaoaiga o le atunuu i lena taimi, ae mo le itu i taaloga, na saunoa Luxon o se taimi o le a matuā tāua mo le lakapi liki i Niu Sila, ma o le a atili faaosofia ai le naunau o tupulaga faia’e o le atunuu i lea taaloga ma atili ai ona uuna’ia le lakapi liki i totonu o le atunuu.
E faatalitalia le oo atu i le 50,000 tagata o le a matuā pāpātutu’i ai falematamata o le malae i lea taaloga i le va o Kuiniselani ma Niu Sa Uelese.
Ua faamautinoa mai ai lenei taaloga i le mavae o le tolu tausaga o faagasolo le tele o taumafaiga ma talanoaga sa faia ma le NRL ma le Komisi o le Lakapi Liki a Ausetalia.
Saunoa le Palemia, ua matuā faafiafiaina le malo i lenei fuafuaga e talimalo ai Niu Sila i le State of Origin, auā e lē gata o le a aogā mo pisinisi i totonu o le aai, ae o le lauiloa ai foi Niu Sila o se tasi o atunuu iloga i le lalolagi e mafai ona faia ai ni taaloga tetele faapea.
E mautinoa o faamoemoe tetele nei o le a matuā tele ai faamanuiaga i o tatou aai, e lagolagoina ai pisinisi ma faaopoopo ai isi avanoa faigaluega ma atili malosi ai lo tatou tamaoaiga; e iai le talitonuga e ono oo atu i le $17.4 miliona se tupe o le a tului mai i le tamaoaiga o Aukilani i lena taimi.
O lenei taaloga e mautinoa o le a matuā tutumu ai faletalimalo, o le a matuā pisi fale’aiga ma pa pia, ma na saunoa le pulenuu o Aukilani, Wayne Brown, o event tetele faapea e atili ai ona tatou talitonuina e mafai e lo tatou aai, ona faia ni mea mata’ina faapea, ma tosina mai ai le tele o investment, o le a toso mai ai le tele o tagata tafafao maimoa mai isi atunuu ma atili tele ai foi avanoa e lē gata i avanoa faigaluega a o isi avanoa mo se manuia o le atunuu.
Fai mai Brown, o le mauaina o le avanoa e toso mai ai se taaloga a le State of Origin e fai i Aukilani, ua atagia atu ai le malosi o le aai o se tasi o nofoaga tutotonu autū mo taaloga auā o Aukilani o le faatumutumuga lea o le lakapi liki i Niu Sila, ona o le Warriors.
O lenei faasilasilaga na faaoo faatasi mai e le alii Palemia, Christopher Luxon, le Pulenuu o Aukilani Wayne Brown, ma le tama’ita’i Minisita o Turisi, Louise Upston.
Puna o Faamatalaga: https://www.rnz.co.nz/news/sport/586941/auckland-s-eden-park-to-host-state-of-origin-match-in-2027?cid=newsletter
