Tusia: Maina Misa Foma’i – Vai
Ua faaalia i le saunoaga a le Tamaita’i Palemia o Samoa i le afiafi nei o le a tatala tuaoi faavaomalo o Samoa ia Aokuso/Setema i soo se tasi, atoa ai ma le faanofoesea na’o i latou o le a maua i suesuega i le taimi e taunuu mai ai i Samoa o loo aafia i le vairusi o le Koviti-19.
O lea faaiuga na faaiugafonoina e le Kapeneta ina ua mae’a iloilo ai fautuaga mai le Komiti o Faalavelave Tutupu Faafuase’i ma le Matagaluega o le Soifua Maloloina. Na faaalia fo’i le tumau ai pea o le atunuu i le Laasaga 2 a’o talatala lemu ai e le malo nisi o aiaiga i Poloaiga o Faalavelave Tutupu Faafuasei e pei ona iai nei le atunuu. O le a amatalia lea i le po a taeao a malama le Aso Lulu, ma faaauau ai mo le isi 2 vaiaso lea e faamae’a i le aso 17 o Me (03-17 Me, 2022)
Ua tatala ai le malaga mai o tagata Samoa mo soo se mafuaaga lava i totonu o le atunuu i le masina lenei, ae ia mulimulitaia pea aiaiga faasoifua maloloina. E aofia ai fo’i le tatala ai o avanoa mo tagata mai fafo e galulue i konekarate faavaomalo i Samoa nei, ae ia usitaia pea aiaiga faasoifua maloloina. Ua aiaia le 7 aso e faanofoesea ai i latou ua taunuu mai i le atunuu i le taimi nei, ma o loo iai i nofoaga faanofoesea, ae mo isi malaga o loo fuafua mai i le masina nei ma le lumanai o le a faanofoesea na’o i latou e suesue atu i le taunuu mai ai i Samoa, o maua i le vairusi o le Koviti-19 (test positive).
O i latou o le a suesue atu e leai se vairusi o maua ai (test negative) o le a faate’a i tua i o latou aiga, peitai e iai aiaiga o le a tuuina atu iai, e pei o le ripoti atu o a latou suesuega (tests) i le Matagaluega o Soifua Maloloina i taimi faatulagaina. E aofia ai i nisi o tulaga ua talatalaina e le malo le toe fo’i atu ai o tamaiti aoga o le Iunivesite Aoao o Samoa i Lepapaigalagala i Vaivase e faaauau aoaoga, e pei ona faatulaga mai ai i le amataga o le masina lenei. O tamaiti mai aoga amata, o aoga tulagalua faapea kolisi o loo iai le fuafuaga e amata talatala i le masina nei, ma o loo tālia ai le faataotoga mai o se fuafuaga a le Vaega Ma’oti o Aoga mo le toe a’e uma o aoga i le masina nei o Me.
Ua faatulaga mai le taimi tatala o Pisinisi mai le 6 i le taeao i le 10 i le po mai le Aso Gafua i le Aso Toona’i, ae faatoa amata le vavao mai le 11 i le po i le 6 i le taeao o le isi aso fou. Ua tatala le Aso Sa mai le 12 i le aoauli i le 10 i le po, atoa ai ma le tatala o potopotoga e pei o lotu i totonu o fale ma fafo ae ia usitaia le faia o talifofoga, faaalia o pepa tui faapea le tutū ma nonofo vāvā. Na faaalia i le saunoaga a le Tamaitai Palemia, Afioga Fiame Naomi Mata’afa, o le vaaiga a le Matagaluega o Soifua Maloloina e foliga mai o le faaiuga o le masina nei e faaono vaaia ai se ata o le taunuu ai o le pepesi o le faama’i i le atunuu i lona tumutumuga, ma amata ai ona toe foi ifo i lalo.
Sa faafetaia e le Tamaitai Palemia le sao o le atunuu i taumafaiga uma mo le puipuiga amata mai Auauna a le Atua, Pule a Alii ma Faipule, o le aufaigaluega muā’au a le Malo ma paaga uma, faapea ai le Matagaluega o le Soifua Maloloina. Sa ave foi le faamaise ma upu faamafanafana a le Palemia o Samoa i ē ua avea le soifua ma le ola ona o le faama’i oti o le Koviti-19…. “Ou te momoli atu faamaisega i aiga ma fanau pele ua tatala mafutaga pele ma mamae, ona o le maliu ma le oti, e mafua ona o aafiaga ogaoga o le faama’i. E tatalo pea lo tatou Malo, i le pa’i mai o aao alofa o lo tatou Atua, e faamafanafana ma Lave i Manino le faavauvau ma le loifofoga o le faanoanoa, ma ia faamaise lona Agaga Paia i aiga, ma fanau pele, aemaise ē o tagi mai ala”.
